Канон Пресвятому Духу Параклиту (Утешителю)

Творение прп. Максима Грека

 

КАНОН БОЖЕСТВЕННОМУ И ПОКЛАНЯЕМОМУ ПРЕСВЯТОМУ ДУХУ ПАРАКЛИТУ

 

Глас 4. Песнь 1. Ирмос:

«Божественнным покровен медленноязычный мраком, извитийся зова Богописанный законы тину бо оттряс очесе умнаго, видит Сущаго, и научается Духа разуму, хваля Божественными песньми».

Припев: Слава Тебе Боже наш, слава Тебе.

Иже манною препитавый Израиля в пустыни древле, и душу мою, Владыко, Духа наполни Всесвятаго: яко да о нем Богоугодно служу Ти выну.

Со бесплотными Твоими слугами, смея припеваю Ти и аз, земля сый и пепел, трисвятого гласа пение, Троице таяжде и Единице преблагая.

Всегда бурями губительных страстей и духов возмущаем душею, тебе всеблаженному Параклиту, яже о моем спасении, яко Богу возлагаю.

Нестроением всяческих беззаконных помыслов омрачаем люте, губительного сего, молю Тя, избавити мя изволи недуга.

Глубиною неразумия, и лютого нерадения дреманием потопляем бедне, к Тебе Всепречистому вопию: душевные сея тли избави мя.

Слава:

Во чрев заченши девственнем, Егоже из чрева прежде век Отец роди, чревными сладострастии порабощение твоею крепкою свободи мя силою.

И ныне:

Земля ты едина свята воистинну, яко рождшая всех Божественный живот: землю плодоносну душу мою твоему Сыну покажи, Богородице.

 

Песнь 3. Ирмос:

«Разверзе утробы нечадствовавшия узы, досаду же неудоботерпиму благочадствующия, едина молитва Пророчицы древле Анны, носящия дух сокрушен, к сильному и Богу разумов».

Благости Твоея, Святая Троице, познание велие есть, обновление созданного по Твоему Божественному образу: егоже, воплощением предивным единого из Тебе паче слова, себе жилище Божественное показал еси.

Даровании Твоими святыми, и помыслы священнолепного благоговеинства, Владыко, ум мой украси: яко да в тишине души и святолепном устроении пою и прославляю Тя, Божественный Утешителю.

Тайная плотская движения, от гордостные страсти во мне рождаемая, и прескверна оскверняющая окаянную душу мою, отнюдь истреби от сея, Владыко, молютися.

Броздами и уздою Божественного страха, Владыко, бесстудные души моея встягни устремления: яко да зельным благоговеинством, и трезвенною мыслию пою Тя, и славлю, Божественный Утешителю.

Многими блужении растлився конечне, к Тебе пресветлейшему Солнцу второю притекаю: Божественным Твоим светом душевные ми очи просветити изволи, Божественный Утешителю.

Слава:

Живота всех питатель Владыко, умерщвленную мою душу скверными страстьми, оживотворити Божественным Твоим посещением изволи.

И ныне:

Животворных повелений твоего Сына, Пречистая, прилежна и спешна делателя покажи мя, лютое разленение и глубокое дремание от души моея отнюдь истребивши.

Также глаголи стихи сия:

Спаси от бед раба Твоего, Утешителю Благий, яко зело и безпрестанно нападают на мя нечистии бесове, помыслы и мечтании скверными.

Призри благоутробием, всепетая Богородице, на жестокое сердца моего окаменение, и просвети тму души моея.

 

Кондак, глас 2.

Подобен: Вышних ищя:

Всех живота, источника приснотекущаго Божественных даров, Духа всесвятаго, яко Отцу единосущна, и Сыну соприсносущна, в песнех благоверно воспоим и величаим, и яко Богу верою поклонимся.

Поклоняюся Тебе, Владыко Утешителю Боже: помилуй, и спаси поклоняюшихся тебе, и Бога исповедающия Тя.

 

Песнь 4. Ирмос:

«Царю царей, Яковый от Якового един, Слове, произшедый от Отца безвиновного, равномощного Твоего Духа Апостолом истинно послал еси яко благодетеля, поющим: слава державе Твоей Господи».

Услышати сподоби мя Господи, тогда многожелаемое звание твое, в невестник небесный созывающее всех преподобных Твоих.

Осуждена человека, злоначальника прельщением, взыскал и спас еси, Троице Святая, и прославил еси его: и мое изнемогшее печалию сердце, свыше крепостию твоею утверди, и возбуди мысли мои.

Божественным страхом пригвозди окаянные моея плоти мудрование, и памятию будущих мучений душу устраши.

Дерзновение Божественно подаждь ми, водруженную грехом во мне худость истребив, и Твоею просвети мя благодатию.

Богородице всепетая, смиренную, Божественным дарованием обогати душу мою, высоту смиривши величания.

Слава:

Священное жилище твоего Сына, Богородице, покажи душу мою, бесчисленные ее скверны отгнавши.

И ныне:

Крепце погибаема нестроением душевным, всепетая, молитвами твоими утверди мя в Божественном страсе и любви.

 

Песнь 5, Ирмос:

«Решительное очищение грехов, огнедохновенную приимите Духа росу, о чада светообразная церковная: ныне бо от Сиона изыде закон, языкоогнеобразная Духа благодать».

Направи живот мой пресущественная Троице, Боже мой, к Твоим спасительным заповедем, и светом Твоим душу мою просвети, молютися.

Обдержима суща пленицами лютых прегрешений, решити мя от сих благоволи Преблагий, и целомудрия любовию Божественною воспери мя.

Освети Твоею Божественною благодатию, Утешителю, страстьми омраченную душу мою, и глубокую неразумия тму от нея иждени.

Зело безбоязненно по вся дни прогневляю Тя, делы же и словесы скверными, Преблагий: но молю Тя: нечестия сего избави мя.

Слава:

Едина Дева, рождшая  всякия премудрости источника, преступлением Божественных заповедей объюродевшую душу мою отнюдь, вразуми всепетая.

И ныне:

Истреби чистая от души моея стужающия ми безпрестанно злыя помыслы, и Богоугодными обогати мя поучении.

 

Песнь 6. Ирмос:

«Очищение нам Христе и спасение Владыко, возсиял eси от Девы: да яко Пророка от зверя морского персей Иону, от тли исхитиши всего Адама всеродна падшаго».

Страстьми горькими плотскими огорчен быв окаянною душею моею, и в тех, аки в последних безднах, выну Спасе мой потопляем, тебе молюся: струями живодательного, иже у тебе, источника, оживи мя.

Великого востинну молчания достойна суть вся Твоя таинства: трилицствуеши бо во едином существе, и соединяем, пребывавши несмесен. Но безначальная Троице, Боже наш, Твоих рук бренное создание спаси мя.

Весь цел Сын веруем есть во Отце существенне и Духе: от Него бо аки от единаго начала соприсносущне оба сияют, и пребавают о Себе в живоначальных ипостасех Своих.

Юности гнусными стрекании на мя вооружився скверный всяким образом, теми душу мою и живот весь осквернил есть: но Утешителю Преблагий, плодами покаяния исцели мя.

В напасти лютыя по уму падох, и недоyением содержим есмь всюду, и в беды различныя впадаю, и якоже ладия в морском волнении обуреваем есмь: но Преблагий Утешителю, лютого сего обуревания, молю Тя, скоро исхити мя.

Слава:

Падением лютым падох, преступив к твоему Сыну, Марие, обиты моя: но яко источника щедрот, и благоутробия сущую пучину, всенепорочная молю тя: милостива сотвори ми Его.

И ныне:

Губительные на мя наветы невидимых врагов моих, Дево, изгоняй всегда от души моея, непобедимою и Божественною силою твоею, и даждь ми на них всеоружие духовное и разум.

Таже, спаси от бед:

 

Кондак, глас 2.

Всех животе, свете и утешение, надеждо и наслаждение, всесвятый Душе, Бога Тя знающих Отцу и Сыну сопрестольна, даров Твоих сподоби, и грехов отпущение даруй им.

 

Песнь 7. Ирмос:

«Согласная возшуме органская песнь почитати златосотворенный бездушный истукан: утешителева же светоносная благодать почествует, еже вопити: Троице единая, равносильная, безначальная благословенна eси».

Всякие злобы и худости нравов свободив мя, Спасе, даровании всесвятыми Божественного Параклита обогати мя, поюща: отцев Боже благословен еси.

Всякого железа и камене жесточайшее сердце мое умягчи, Спасе, да истинным умилением возопию спасаемы отцев Боже благословен еси.

Со Отцем безначальным, Сына и Духа соприсносущна, во едином существе и триех лицах Богословствующе поем: отцев Боже благословен еси.

Лукавым обычаем греховным рабски побеждаем, тебе всех Владыце припадая, молюся: скверные сея работы избави мя.

Крепкою силою твоею, грехом изнемогшую душу мою утвердили благоволи, да воззову спасаемы отцев Боже благословен еси.

Слава: Разумом Божественным, и теплым покаянием, Богоблагодатная, ум мой и душу люте грехом помраченную, просветити изволи, да пою ти со Архангелом, радуйся Владычице.

И ныне: Плоти моея беззаконная и пристрастная движения, Богородительнице, умертвивши конечне, благодать Параклитову в души моей насади, да святолепне тя пресвятую прославляю всегда.

 

Песнь 8. Ирмос:

«Разрешает узы, и орошает пламень трисветлый Богоначалия образ: поют отроцы, благословит же единого Спаса и вседетеля, яко благодетеля, сотворенная всяческая тварь».

Губительного разжжения беззаконных помыслов разреши мя, Иисусе мой, да чистым сердцем славлю Тя.

Со Бесплотными слугами Твоими высочайшую и вседетельную Троицу поем Тя, и превозносим перстнии раби Твои.

Губительныя находы врагов моих невидимых изгоняя от души моея, благодать Твою вселити в ней, Утешителю, изволи.

Прошений, ихже у Тебе прошу молитвою, совершати бодрен но делом и страхом и любовно сподоби мя Утешителю.

Гордыми помыслы сатанинскими бесящуюся всегда душу мою, Владыко, якоже веси, исцели.

Паче блудницы и Исава беззаконовав, к Твоим щедротам прибегаю: не отрини мене от благодати Твоея, Утешителю Пресвятый.

Благословим Отца, и Сына, и Святого Духа, Господа,

Грехолюбив зело паче всех человек сый, всептый отцев Боже, к Тебе прибегаю: спаси мя недостойного раба Твоего.

И ныне: Любомудрия истины Божественного, рачителя покажи мя Всепетая Мати, страхом и любовию исправляющи мя.

 

Песнь 9. Ирмос:

«Радуйся, Царице, матеродевственная слава: всяка бо удобообращательная благоглаголивая уста витийствовати не могут, тебе пети достойно, изумевает же ум всяк, твое рождество разумети, темже тя согласно славим».

Спасе мой, просвещение и защитниче, от Твоея Божественные радости не отрини мене, пречистые Твоея Матере молитвами святыми.

С горними силами, и аз, со страхом покланяютися перстный, и любовию вопию Ти: Троице Всесвятая, Боже наш, слава Тебе.

Спаси мя поющаго, покланяющагося и славословящого державу неприступный славы Твоея.

Благости нравов, и наказанию закона, и разуму Божественных догмат научи мя, да благоугодно пою Тя Божественный Утешителю.

Всех праведных и благоугодивших Ти сподобитимися изволи радостного праздника, да вкупе с ними пою Тя, Пресвятый Утешителю.

Души моея страхование, и различные злобы, и всю ее истребив худость, добродетелей венцем украси ю, Святый Утешителю.

Слава: О всенепорочная Дево, растлившуюся всяческими блужении окаянную душу мою, твоими святыми молитвами исцели.

И ныне: О Божественная ходатаице Богу и человеком, худую сию молитву мою Божественному Утешителю принеси, молю тя всесвятая Богородице.

Таже: Спаси от бед:

 

И тропари сия:

Достойно есть воистину величати тя Бога Слова, егоже трепещут и ужасаются Херувими, и славословят Силы небесные, от Девы непреложно воплощшагося Христа, Жизнодавца и Господа.

Достойно есть воистину превозносити Тя славословии Всепреблагого и Всепресвятаго, и хранителя жизни нашея, со Отцем и Сыном Богоначально царствующего видимыми и невидимыми, от Отца Единого исходящого Божия Духа, велика же и страшна со страхом славити.

Слава: Поем Тя вси Боголепно пении Божсственным, Отца и Сына и Духа Божественного, трисоставную державу, Едино царство и господство.

И ныне: Владычице, Мати Избавителя, приими молитвы твоих непотребных раб: имже воздаждь избавление грехов, и Богоугодные жизни приятное исправление.

 

Молитва по пресвятому Духу. 

Приими Владыко, преблагий Утешителю, Един сый Святыя и покланяемыя единосущныя же и неразделимыя Троицы, худое cие моление, емуже благоволил еси приносиму бывати Тебе, от человека грешного и осужденного: и прости ми согрешения моя, вольная и невольная: от тайных моих очисти мя, и от чуждих пощади раба твоего. Благоволи о мне грешнем и непотребнем, и немощи души моея посети благодатию твоею, и исцели сокрушение ея. Помилуй мя, Владыко, Параклите, Боже, помилуй мя, освяти мою душу и тело, просвети ми ум и разум, очисти совесть душевную от всякия скверны, нечистых помыслов, умышлений лукавых и разумений хульных, и от всякого превозношения, гордости же и кичения, высокоумия же и дерзости, и сатанинского шатания, и от всякого фарисейского лицемерия и презорства, и от всякого студного и лукавого обычая моего избави мя до конца, славы ради имене твоего: и даруй ми искреннее покаяние, сокрушение сердца моего и смиренномудрие, кротость же и тихость, и всякое христианское благоговеинство, разум же и художество духовное, со всяким благоразумием, благодарением и терпением совершенным. Ей Боже, славы ради имени Твоего услыши мя грешного молящагося Тебе, и сподоби мя, в прочее время окаянныя жизни моея каятися искренне моих беззаконий, со всяким смиренномудрием, целомудрием же и воздержанием истинным, отступившу мне всякого сомнения, двоедушия, и нечувствия, и соблюди мя, Владыко, во всяком благочестивом и православном исповедании веры христианския: да сподоблюся во вся дни живота моего, без сомнения пети Тя, благословити, славословити, и глаголати: Святый Боже, Отче безначальный: Святый Крепкий, Сыне Его собезначальный: Святый бессмертный, Душе Святый от Отца исходяй, и в Сыне пребываяй и почиваяй: Троице Всесвятая слава Тебе. Слава Тебе Святая Троица единосущная, животворящая и неразделимая, всех ради слава Тебе.

Назад к списку